Miðsumar og íllskeyttir veðurguðir

Eftir að við komum heim i Jagersbo á fimmtudagskvöld, höfum við að mestu tekið það rólega.  Svíar héldu upp á miðsumar á föstudag og var ætlunin að horfa á þá reisa miðsumarstöngina og dansa í kringum hana með þeim.  

það rigndi svo mikið þennan dag að lítið var úr dansinum. Fórum síðan um kvöldið til að halda uppá daginn með síldaráti og tilheyrandi með vinum okkar Önnu og Valla í Trelleborg. Sváfum þar reyndar um nóttina þar sem við vörum ekki keyrsluhæf.

Fórum uppeftir á laugardag og höfum legið í leti síðan með þeirri undantekningu að við fórum að skoða húsbíla og hýsi í Vinslöv í dag.Veðrið síðustu daga hefur heldur ekki boðið uppá ferðalög enda ýmist rigning með þrumum og tilheyrandi eða stormur eins og í dag.

Læt fylgja með mynd af matnum á laugardagskvöld..

 

Poznan Szczecin (Í fyrradag)

16 júni 

Lögðum af stað frá Poznan um ellefu í morgun og keyrðum áleiðis til Szczecin og það var oft stoppað á leiðinni. Keyrðum meðal annars framhjá bílasölu eða gömlum bílum sem var verið að henda en þarna það voru líka tvær þyrlur á svæðinu.

Komum til Szczencin um fimmleitið og komum við okkur fyrir á fínu hóteli ætluðum svo niðrí bæ að borða, en þá kom svo mikil rigning að það var ekki hundi út sigandi þannig að við borðuðum á hótelinu og höfðum það bara gott það sem eftir var kvölds.

17 júní

Lögðum af stað frá Szczencin um tíu um morguninn áleiðis til Stralsund í Þýslalandi. Stoppuðum á svakalega stórum flóamarkaði sem var með allt milli himins og jarðar til sölu keyptum ekkert  enda evrurnar voru nýbúnar . Þegar við vorum nýkomin yfir landamærin til Þýskalands þá stoppaði Þýska lögreglan okkur voru þeir með vegaeftirlit og spurðu þeir Gaua um vegabréf og ökuskírteini og Gaui var fyrri til og sagði þeim að vinur okkar væri skráður fyrir bílnum, brostu þeir og hristu hausinn yfir þessum Íslendingum sem væru í fríi í Svíþjóð og væru að ferðast um þýskaland Tékkand og Pólland.

Ég spurði þá hvort ég mætti taka mynd af þeim og var það sjálfsagt og læt ég fylgja mynd með. Komum til Stralsund um tvöleitið og skráðum við okkur inn á hótel strax og fórum svo til Bergen sem er um hálftíma keyrsla og ætluðum að kaupa bjór en þegar við komum þar þá var lokað fyrir söluna á dollubjórnum kl 4 svo við keyrðum aftur til Stralsund og kíktum niðrí bæ og fengum við okkur að borða og fórum svo uppá hótel snemma af því að við ætluðum að vakna snemma.

18 Júní

Vöknuðum sjö um morguninn og fórum í morgunverð og tékkuðum okkur út, fórum síðan til Bergen og keyptum bjór og kíktum svo yfir til Sassnitz og skoðum okkur aðeins um af því að við áttum bókaða ferð með ferjunni til Trelleborgar klukkan 12.45. Fórum við á áætluðum tíma og komum við til Trelleborgar rúmlega fimm. Komum við til Önnu og þáðum við kaffi og vöfflur og komum við uppí Höör um átta um kvöldið þreytt og lúin.

Poznan í miðvestur Póllandi

Um klukkan 11.00 yfirgáfum við Legnica í suður Póllandi og heldur upp á við og enduðum í Poznan.

Stoppuðum í litla ljóta bænum þar sem pólski páfinn er frá. Allavega var þar mikil og fín stytta af honum. Smábæirnir á leiðinni voru einstaklega illa farnir af viðhaldsleysi en þó ekki eins slæmir og tékknesku bæirnir.

Poznan sem við erum í núna er einn af stærstu bæjum í Póllandi og er frægur fyrir að vera mikil menningarborg (þ.e. gömul menning). Bókuðum okkur inn á glæsihótel í miðbænum.

Fórum síðan niður á aðaltorgið og skoðuðum gamlar byggingar og tókum þátt í  miklu "festivali" en mikið var að ske í bænum. Byrjuðum á því að fá okkur þá bestu pizzu sem við höfum fengið og að sjálfsögðu pólskan bjór með. 

 

 

Pólland Legnica

Fengum okkur hótel í Prag sem var ok útlits og höfum við oft verið á svoleiðis hótelum en nóttin var ömurleg ég vaknaði við þegar Gaui hreyfði sig þá brakaði í rúminu þannig að við fórum þreytt af stað níu um morguninn áleiðis til Póllands.

Keyrðum hraðbraut áleiðis og allt í einu voru við á nýjum vegi og gps tækið þekkti sig ekki og keyrðum við af hraðbrautinni og vorum við þá komin í skekkju um 140 km en eins og Matti og Stína segja þá sáum við bara meira. Keyrðum um fjallgarð og var þar aðvörunarskilti um dádýr og allt í einu sá ég dádýr til hliðar við bílinn og segi við Gaua en sætt dádýr en sem betur fer fór það ekki út á veginn. Komum til Legnica um þrjú og fórum á hótel sem Gaui hafði fundið á netinu á 55 evrur en ekki bókað, þegar Gaui kom á hótelið sagði afgreiðslukonan að herbergið kostaði 80 evrur og Gaui minn var ekki sáttur við það verð svo að við keyrðum í næstu íbúðabyggð og komumst inná næsta net (stálumst) og gerðum netbókun á herbergið og fengum við það á 55 evrur en afgreiðslukonan var ansi skrítinn þegar Gaui kom aftur. En þetta var hið fínasta herbergi.

Skoðuðum miðbæinn sem var mjög fallegur og fengum við okkur að borða og enduðum við daginn í rólegheitum uppá hóteli.

Prag

Lögðum af stað frá Berlín um tíu í morgun komum við í Netto og keyptum okkur rauðvín áður en við lögðum af stað það er svo ódýrt kostar bara 1.20 evru flaskan. Keyrðum niður til Tékklands strax þegar við komum yfir landamærin sáum við hvað eftir annað hús í niðurníðslu að grotna niður. Fórum við um fjallgarð og ansi mikinn krókóttan veg niður fjallið.

Komum í bæ sem heitir Útsí og fengum okkur að borða og keyrðum svo áfram til Prag þar komum við klukkan hálf sex og  var stoppað á fyrsta hótelinu og fengið inni.

Gaui labbaði að sjálfsögðu beint á næstu krá til að prófa tékkneska bjórinn.

Berlín skoðuð

Dagur 2 í Berlin

Yndislegur dagur, vöknuðum um 10 leitið og byrjuðum á því að skoða nágrennið. Fórum síðan niður í Fredriksstrasse og fengum okkur alvöru steikur og fórum síða í gönguferð um þennan bæjarhluta.

Komum við á einstaka krám og könnuðum bjórmenningu þjóðverja. Hugrún tók uppá því óvenjulega hátterni að drekka bjór.  Um 5 leitið var farið tilbaka til "Birkenwerder"  og stefnan tekið  á krána frá kvöldinu áður. (sjá neðan) Fengum okkur að borða úkraniska súpu sem var æðislega góð. Fórum síðan uppá Hótel og reyndum að hunsa "evrópu-keppnina í fótbolta". Stefnum á að keyra niður til Tékklands á morgun.

Gærdagurinn 

Vöknuðum seint og vel,  fórum á lestarstöðina sem er við hliðina á hótelinu okkar og keyptum dagsmiða í lestina og fórum niðrí miðbæ Berlinar að skoða það sem var áhugavert.  Byrjuðum á því að fá okkur smá bjór og síðan var farið í 2 tíma ferð með rútu til að skoða áhugaverða staði í þessari merku borg. Þessi rútuferð var reyndar ógleymanleg þar mikið merkilegt var að sjá. Eftir hringferðina um borgina fórum við aftur uppá hótel með lestinni og var það reyndar 25km ferðalag sem tók innan við 30mín. Enduðum að vísu á heimakránni í hverfinu.  Þar tók vertinn á móti okkur og upplýsti okkur um menningu bæjarhlutans "Birkenwerder" með mikilli innlifun.

Komin til Berlin

Í morgun hófum við ferðalag sem ætlunin er að taki 10 daga. Við tókum ferju frá Trelleborg til Sassnitz í gamla austur-þyskalandi. Ferjan er 4 tíma á milli svíaríkis og þýskalands.

Ætlunin var að gista í Stralsund en við enduðum á því að keyra alla leið niður í Berlin c.a. 320km

Komum okkur síðan fyrir á Hóteli í útjaðri Berlin en ætlunin er að skoða bæinn næstu 3 daga. Síðan er ætlunin að keyra niður til Tékklands og stoppa þar 2-3 daga. Farið verður í gegnum Pólland í bakaleiðinni.

 

Helsingborg, Helsingör

Vöknuðum um níu og þvílkur hiti þá strax var 24 stiga hiti, við ákváðum að skreppa til Helsingborgar og taka ferjuna yfir til Danmerkur og skoða Helsingör. Bærinn er lítill og ákaflega gaman að ganga um göturnar þar. Eyddum deginum í að skoða byggingar og finna skuggana af húsunum.

Enduðum síðan á að fá okkur pizzu og tókum síðan bátinn yfir í Helsingborg. Ferðin yfir tók ekki nema tuttugu mínutur.

þegar við komum heim í Jagersbo settumst við niður með nágrönum okkar og fengum okkur í glas eins og góðum íslendingum sæmir á laugardagskveldi.

 

 

 

Strákarnir okkar.

Fórum til Trelleborgar í dag. Strákarnir okkar eiga afmæli 5 og 6 júní, Jón Ásgeir átti afmæli í gær en Óli átti afmæli í dag á þjóðhátíðardegi Svía. Lögðum af stað niður eftir um hádegið og kíktum í heimsókn til Önnu og Valla og þáðum kaffi og  með því.

Fórum síðan til Óla í heimsókn og á leiðinni til hans sáum við svolítið fyndið. Maður gekk með bíl eftir götunni, en þetta var bíll sem er ekki þarf bílpróf til að aka,  þar sem hann er með skellinöðrumótor og kemst ekki nema á 40km hraða. Við vorum viss um að maður væri ekki að spara bensín heldur væri í göngutúr með bílinn. (sumir fara jú í göngutúr með hundinn. (sjá myndina að neðan)

Hittum Óla og réttum honum smá pakka.   Eyddum síðan kveldinu með nágrönnum okkar í jagersbo.

Söknuður

Hiti og aftur hiti. Veðríð er búið að vera dásamlegt síðustu daga en dagurinn í dag sló allt út.  Klukkan sex að kveldi var hitinn skv. veðurstofunni í Höör kominn niður í 29 stig.

Erum búin að liggja í leti í gær og dag enda alltof heitt til að hreyfa sig. Fórum að vísu niður í Lund í dag til að versla og reyndum að halda okkur innandyra.  Ég (Guðjón) eyddi síðan deginum í vinnu (fjarvinnu). Vígðum að vísu kæliviftuna okkar nýju í dag.

Engar myndir að þessu sinni enda of erfitt að lyfta myndavélinni. Söknum vina okkar Matta og Stínu mikið.

 

Danmörk

Fórum í búðir í gær og lauk degi með því að þegar við komum uppí hýsi seinni part dags þá var kallað á okkur og okkur boðið í brauðtertu af nágrönnunum okkar. Læt ég fylgja myndir frá því.

 

 

Vöknuðum um níu í morgun við alveg frábært veður og sátum smá í sólbaði, en þvílíkur hiti að ég gafst upp og hætti að sóla mig eftir hálf tíma. Um hádegisbilið fórum við til Köpen og fórum í gönguferð upp strikið og þvílíkur mannfjöldi. Síðan fórum við einnig að skoða styttuna af hafmeyjunni sem ég var að sjá í fyrsta skipti (Hugrún). Undir kvöld keyrðum við til Kastrup en Matti og Stína áttu flug um 21:20 heim til Íslands þannig að nú verður ansi tómlegt í koti okkar. Ég læt fylgja með myndir frá Köpen.

Síðan keyrðum við tilbaka til Höör með viðkomu í Trelleborg. 

 

 

 

 

 

 

Þýskaland og fleira

Fórum til Þýskalands 20 mai og keyrðum til Lubech og vorum þar á tjaldstæði sem var mjög gott . Á því tjaldstæði sáum við húsbíl sem var vel merktur hét Flakkari og var frá Vestmannaeyjum þar voru hjón sem komu á laugardeginum áður og voru á leiðinni til Garda á Ítalíu og ætluðu þau til Íslands í september.

Fórum einnig til Hamborgar og skoðuðum okkur um, og eins var farið í siglingu um Lubech og fórum við einnig til til Bremen og skoðuðum húsbílasölu.

Fórum 25 mai heim á leið til (Höör) og keyrðum við til Putgarden og tókum þar ferju yfir til Danmerkur. Í Puttgarden var ansi stór  fríhöfn sem var bátur við festar á þremur hæðum. Vorum við um átta tíma á leiðinni frá Lubech till Höör, með því að keyra yfir Öresundsbrúna.

Í gær var þvílík rigning. Það rigndi eins og hellt væri úr fötu allan daginn, þannig að við  fórum til Malmö og Trelleborgar og kíktum aðeins á Önnu og Valla og komum heim um sjö um kvöldið

Þegar loksins stytti upp, þvílíkt dýralíf broddgöltur labbandi um og endur að synda í polli við fortaldið.

Í dag var bara haft það gott og sólin sleikt. Set inn myndir frá þýskalandi

 

 

 

Danaveldi

Í gær fórum við af stað til Óðinsvé í danaveldi. Lagt var  af stað til Trelleborgar til að ná í veglykil fyrir Aurasundsbrúna og Stórubeltisbrúna um tíuleytið. Fengum kaffi og kökur hjá heiðurshjónunum  Önnu og Valla..   Fórum síðan af stað til danaveldis og komum til Óðinsvé um 5 leitið.  Stuttu eftir að við komum á staðinn fórum við að versla í “Fakta” sem var einstaklega  sóðaleg búð, með kössum á gólfinu sem við þurftum að sparka til hliðar til að komast áfram um búðina.

 Um kvöldið fórum við að að heilsa uppá Þóru og Ágúst, og var boðið uppá kaffi, viskí  og æðislega hjónabandssælu með rabbabarasultu. Komum síðan heim á tjaldsvæðið um kl: 22:00 Í dag komu Þóra, Ágúst og Viktor Daði  í heimsókn á tjaldsvæðið og skiluðu Matta vitinu (húfunni sinni) . Þegar þau voru farinn fóru Matti, Stína og Hugrún að versla í “Molli” en Guðjón fór að vinna á tölvuna.  Á leiðinni frá Mollinu lentu þau í hagléli þar sem höglin voru 1cm í þvermál. 

Seinna um daginn fórum við til Egeskov þar sem við skoðuðum gamla bíla og mótorhjól.. Þegar lagt var af stað tilbaka var GPS tækið stillt á tjaldsvæðið. Þá byrjaði fjörið. Konan í tækinu fór yfirrum af stressi og bílstjórinn líka. Þegar heim var komið var bílstjóranum bjargað með einum öl en konuna í tækinu veit ég ekki um.
Þegar heim var komið fóru Hugrún, Stínu og og ég í  göngutúr en Matti settist að skriftum.

Kalmar og Öland

Fyrsta daginn sem Matti og Stína voru hjá okkur byrjuðu læsingarnar á bílnum að bila, hver á fætur annarri. Fyrst bilaði central lásinn, síðan læstist önnur hurðin að aftan þannig að ekki var hægt að opna hana. Glugginn farþegamelinn fór í verkfall þannig að Matti og Stína tóku að sér stórviðgerðir alla helgina fram á þriðjudag.

Í þakklætisskyni fyrir viðgerðirnar læsti Guðjón síðan Stínu úti þegar farin var næturheimsókn á klósettin. Guðjón fór á undan um miðja nótt og mætti Stínu á leiðinni tilbaka, og af gömlum vana læsti hann vagninum innanfrá áður en hann fór að sofa aftur. Sem betur fer var Matti vakandi og opnaði  fyrir frúnni sem annars hefði orðið að gista í fortjaldinu restina af nóttunni (fannst hann vera prinsinn á hvíta hestinum við tilefnið).

Fórum á miðvikudaginn upp til Kalmar var það um 280 km og gekk það vel vorum á fínu tjaldstæði. Því miður var ekkert internet á svæðinu eins og lofað var í bæklingnum þannig að við gátum hvorki bloggað né Guðjón unnið. Fórum til Ölands á fimmtudaginn og var eyjan skoðuð m.a. Borghólmvirki og er það ansi mikilfenglegt, aðeins 5000 fermetrar undir þaki. Þar voru þvílíkir rangalar. Skoðuðum síðan myllur og í það fór restin af deginum. Eyjan er 180km löng þannig að náðum ekki að skoða hana alla. Daginn eftir ætluðum við að fara til Álands en spáin var það leiðinleg að við hættum við og ákváðum að fara til Höör og taka síðan stefnuna á Þýskalands. Sem betur fer tókum við saman fortjaldið snemma um morguninn  því stuttu seinna fór að helli rigna. Í bakaleiðinni til Höör var stoppað við Kosta Boda verksmiðjurnar. Í húsi við hliðina á Kosta Boda verksmiðjunni  var maður með verkstæði og verslun með gler og kristal.  Þar var mikið af fallegum munum hönnuðum af manni sem heitir Herman og keypti ég (Hugrún) lítinn sætan kött úr gleri.

Í dag var síðan farið í Malmö í verslunarferð. Ætlunin er að fara yfir til Danaveldis á morgun og þaðan áfram til Þýsklands.

 

  

Íslendingar

Föstudagurinn var mjög góður Áslaug Siggi og Anna komu í heimsókn og þáðu kaffi og með því. Um kvöldið komu Hvanneyringarnir Guðrún og Valdi í heimsókn í yndislegu veðri og eins og sönnum víkingi þá skellti Valdi sér til sunds í vatninu,  skelli mynd með.

 

 

 

 

Á föstudeginum bilaði bílinn þannig að ég gat ekki lokað glugganum mín megin ( Hugrún). Reyndum við að láta laga það hérna í Höör en hann hafði ekki tíma svo að við keyrðum til Trelleborgar á laugardaginn til Valla snilling. Hann vissi hvernig átti að laga gluggann svo að ég var með opinn gluggann á hraðbrautinni til Trelleborgar og var orðin vel kæld öðru megin. Eins og  ég sagði gat  Valli snillingur lagað gluggann sem betur fer af því að Matti og Stína voru á leiðinni til okkar (ætla að vera hér í  þrjár vikur.

Náðum við í þau til Kaupmannahafnar um klukkan eitt í frábæru veðri.  þegar við komum til Höör var  hitinn kominn í 28 stig, þannig að við höfðum það rólegt læt ég fylgja mynd af Matta og Stínu njóta sín í botn í sólinni.

 

 

23 stiga hiti og sól og 1m/s (logn)

Guðjón svaf yfir sig í  morgun, vaknaði ekki fyrr en kl: 10 í 15stiga hita og sól. Hitinn fór síðan í 23 stig eftir hádegi. Heldum síðan til Trelleborgar þar sem Guðjón skipti um dekk á bílnum og fórum síðan í BILTEMA við Malmö og keyptum hjólkoppa.

Fórum síðan að hitta Óla son Guðjón, sem býr í Trelleborg.

Keyrðum síðan heim í Jagersbo með loftkælinguna í gangi. Þegar heim var komið rákumst við á Benzinn hér að neðan á bílastæðinu. Benz þessi er árgerð 1950

Dýragarðurinn og Villisvínasteikin

Byrjuðum daginn á því að fara með bílinn í stillingu. Fengum síðan hann aftur um hádegisbilið og fórum þá í smá skoðunarferð í nágrannaþorpin. Hitinn lá í kringum 20-23 stig og sólin skein allan daginn. Um þrjú leytið fórum við síðan í Skánska dýragarðinn en því miður lágu flest dýrin í leti í hitanum eins og sjá má á Elgnum á myndinni hér að neðan.  í heimleiðinni versluðum við villisvínasteik til að prófa eitthvað nýtt kjötmeti. Sem betur fer keyptum við smá nautakjöt til að hafa með. Villisvínasteikin reyndist frekar seig og bragðlaus.

 

Sumarið að koma

 

Undanfarna daga höfum við tekið það frekar rólega, enda notalegt hér í stigandi hita. Veðrið fer batnandi með hverjum degi og er gert ráð fyrir 25 stiga hita í lok næstu viku., Í gær fórum við niður í Trelleborg til að kaupa fisk og heimsækja vini okkar. Fengum okkur síðan í glas með sænskum nágrönnum okkar þegar við komum heim í hýsið.  Á leiðinni til Trelleborgar rákumst við á gamlan Austin árgerð 1957. Eigandinn að bílnum er búinn að eiga hann frá upphafi og var hann notaður sem leigubíll í allmörg ár. Bílinn var á leiðinni á safn í Dölunum enda eitt af fáum eintökum sem ennþá er skráð á götunni.  

Mynd af bílnum fylgir hér að heðan. Einnig fylgir með mynd af Trabant sem við rákumst á á hraðbrautinni til Lundar

Föst í umferð á hraðbraut

Vöknuðum hálf tíu í morgun þvílíkar svefnpurkur fengum okkur smá að borða og drifum okkur út í þetta yndislega veður sól og blíða var reyndar svolítið rok. Fórum til Malmö í kaffi til Guðrúnar Bjarnadóttur, Hvanneyrings og stoppuðum þar í um tvo tíma. Á bakaleiðinni fórum við hraðbrautina og  lentum við í rúmlega klukkustundar  umferðarteppu sem myndaðist þegar kviknaði í  bíl. Hraðbrautin var bara ein akrein þarna, þannig að ekki var möguleiki að komast framhjá og slökkvibíllinn var í vandræðum með að komast að bílnum. Engin slys urðu á fólki, nema andleg af völdum langrar biðar. Set mynd af því þegar við bíðum í biðröðinni.

 

 

 

 

 Þegar heim var komið í Jagersro fór Gaui aðeins að vinna í tölvunni svo ég (Hugrún) ákvað að fá mér göngutúr um hvervið, það er svo notalegt vera með mp3 spilarann og hlusta á Mýrina eftir Arnald sem Kiddi bróðir var svo frábær að redda mér.

BP bensínastöð

Vöknuðum um tíu í gærmorgun og fengum okkur smá að borða og drifum okkur svo út á flakk. Fórum til Hassleholm þar var vorfagnaður tívolí og var verið að sína líka hertrukka og skriðdreka frá safni stoppuðum þar um tvo tíma og fórum svo út í buskann eins og við segjum keyrðum um sveitir og rákumst þar á gamla bensínstöð með öllu við bóndabæ læt fylgja mynd með.

Í dag erum við búin að taka það rólega er búið að vera yndislegt veður í dag algör blíða engin sól en stilla og 18 stiga hiti.